ЧЕТ ЭЛ ФУҚАРОСИ БИЛАН ҚАНДАЙ НИКОҲДАН ЎТИШ МУМКИН?

Яқин кунларда олдимга бир йигит келиб –Мисрда ўқийман, Миср давлати фуқароси билан турмуш қурмоқчиман, никоҳга қандай ариза бераман?- деб қолди. Кўз шифокорим эса- ўғлим Америкада ўқийди, асли ўзбекистонлик аммо хозирда америка фуқароси бўлган қиз билан турмуш қурмоқчи, қандай тартибда никоҳдан ўтишади?-деб сўраб қолди. Демак амалиётда бу каби саволлар кўпчиликни қийнаяпти экан. Келинг бугун шу саволга жабвоб бераман .  Ўзбекистон Республикасининг Оила кодексига (https://lex.uz/en/docs/104720) мувофиқ Ўзбекистон Республикаси ФҲДЁ органларида Ўзбекистон Республикаси фуқароларининг МДҲ мамлакатлари, чет эл фуқаролари ва фуқаролиги бўлмаган шахслар билан никоҳини қайд этиш ҳамда чет эл фуқаролари ўртасидаги никоҳни қайд этиш умумий асосларда амалга оширилади-деб кўрсатилган. Унга кўра –Ўзбекистон фуқароси ва чет эл фуқароси ёки фуқаролиги бўлмаган шахслар ўртасидаги никоҳни қайд этиш агар чет эл фуқаросининг ёки фуқаролиги бўлмаган шахснинг Ўзбекистон Республикасида бўлиш визаси никоҳ тузиладиган кунда ҳақиқий бўлсагина амалга оширилади. Бунда-ФҲДЁ органига чет эл фуқароси ёки фуқаролиги бўлмаган шахснинг никоҳга кириш ҳақидаги аризасига унинг шахсини тасдиқловчи ҳужжат нусхаси ҳамда чет эл фуқароси ёки фуқаролиги бўлмаган шахснинг никоҳда турмаслиги ҳақидаги белгиланган тартибда легализация қилинган ёки апостиль қўйилган ҳужжат (давлат тилига таржимаси билан бирга) илова қилиниши лозим.  Чет элда доимий яшовчи Ўзбекистон Республикаси фуқаросининг никоҳини қайд этиш ўша давлат қонунчилигига асосан унинг ваколатли органлари томонидан ёки Ўзбекистон Республикасининг консуллик муассасаларида ушбу Қоидаларга асосан амалга оширилади.       Ўзбекистон Республикаси фуқаросининг чет эл фуқароси ёки фуқаролиги бўлмаган шахс билан никоҳини қайд этиш, агар никоҳни қайд этиш Ўзбекистон Республикасининг консуллик муассасаси ҳудудида жойлашган ўша давлатнинг қонунлари билан тан олинганда, шунингдек имзолашда ўша давлат ва Ўзбекистон Республикаси қатнашган битим ёки бу халқаро шартномаларга мувофиқ ҳоллардагина консул томонидан амалга оширилади.

Бошқа давлатда яшовчи Ўзбекистон Республикасининг фуқароси билан мазкур давлатнинг тегишли органларида никоҳни қайд эттирмоқчи бўлган ўша давлат фуқаросининг илтимосига кўра, консул никоҳни қайд этувчи ўша давлат органларига тақдим этиш учун ариза берувчи Ўзбекистон Республикаси фуқароси никоҳда турмаслиги ҳақида маълумотнома бериши мумкин. Бундай маълумотномалар консуллик муассасаларида мавжуд бўлган маълумотлар асосида берилади. Агар консуллик муассасасида никоҳланувчи шахснинг оилавий аҳволи тўғрисида маълумотлар бўлмаса консул бу маълумотларни Ўзбекистон Республикаси Ташқи ишлар вазирлиги орқали Ўзбекистон Республикаси Адлия вазирлигидан олади.

Нозима КАРИМОВА,

туман ФҲДЁ  бўлимининг 2-тоифали инспектори.