Тўртликлар
Чашмингдаги ўтда ёнганим – бахтим,
Шаҳду шакарингга қонганим – бахтим.
Ягона ёрим, деб тан олганиму
Бевафо бўлишдан тонганим – бахтим.
***
Дунё бозор, мен ҳам бозорман,
Дўст-ёр келиб, харидлар қилсин.
Ғанимларга энг баланд дорман,
Хасад ила осилиб ўлсин.
***
Озурда дилларга малҳам бўл, дўстим,
Йўқлагил, дуосига бўлгил лойиқ.
Мискин дуоси-ла Ҳақ ижобатин
Ўртасида асло бўлмайди тўсиқ.
***
Варақлама қалб дафтаримни,
Ёзувига тишинг ўтмайди.
Сўйлай десам дил дардларимни,
Тингламоққа умринг етмайди.
***
Ёшликда вафодор бўлмоқ истаймиз,
Бироқ қилолмаймиз вафо эпини.
Ёш ўтгач, вафосизлик кўзлаймизу
Кетолмаймиз узиб вафо ипини.
***
Юрак агар ёнмаса, у юрак эмас,
Гердайгани билан одам терак эмас.
Кимки агар худбин, лоқайд, танбал бўлса,
Одам деманг, у эл-юртга керак эмас.
Ўринбой МЎМИНОВ.

