Қалбимдаги битиклар

Келди баҳор, илиди тупроқ,

Ер остидан чиқди ҳашарот, гиёҳ.

Чиқмади ер остидаги одамлар… Эвоҳ!

******

Ватанфурушлар билмайдилар

Ватан нелигин…

Митти қалдирғоччалик ҳам.

******

Муҳаббат йўлиқса, ҳушёр бўлгил, дил,

Синамай эшик очмагил, кўнгил!

Баъзан вафо тўнин кияр хиёнат…

******

Қад кўтарди ўртамизда бир девор –

Ким, ҳар ғишти димоғдор.

Лойи эса вафосизлик тупроғидан.

******

Севасану севгинг этмайсан ошкор,

Айлайсан битта сўзнинг интиқу зори.

…Бунча баланд бўлмаса, ғуруринг девори.

******

Кўзинг қаросида асра ҳаётда

Сен билан овунган яқин инсонни.

Қалби паноҳ бўлар сенинг қалбингга.

Ўринбой МЎМИНОВ.