Ватан
Норин дарё мавжларида
Ярақлаган кўзмидинг,
Куй-қўшиқнинг авжларида
Жаранглаган сўзмидинг?
Ватан, сени кўчамдаги
Чиноримга бўйладим.
Мушфиқ онам, кекса отам,
Оилам деб ўйладим.
Гоҳ сени момом айтган
Алласида сезаман.
Излаб ялпиз бўй таратган
Даламизда кезаман.
Ватан – мовий кенг осмоним,
Турналари тўлдирган.
Мен туғилган ошёним
Шоирликка кўндирган.
Исмоил Ақилов

