СОҒЛОМ ОВҚАТЛАНИШНИНГ ЎН ИККИ ТАМОЙИЛИ

Саломатлик ва тиббий статистика институти Наманган вилоят филиали овқатланишда қуйидагиларга амал қилишингизни тавсия этади:

  1. Кунига ҳар хил озиқ-овқат маҳсулотларини истеъмол қилинг.
  2. Бир неча маҳал янги узилган маҳаллий мевалар ва сабзавотлардан (ҳар куни камида 400 гр.) истеъмол қилиш ғоят фойдалидир.
  3. Нон ва йирик ун маҳсулотлари, ёрмалар ва картошка ҳар куни истеъмол қилиниши лозим.
  4. Овқат билан қабул қилинаётган ёғ миқдорини назорат қилинг. Овқат тайёрлашда ҳайвон ёғлари ўрнига кўпроқ ўсимлик ёғларини ишлатинг.
  5. Имкони борича ёғсиз гўшт, шунингдек, товуқ, балиқ гўштлари ҳамда дуккакли маҳсулотлар тановул қилинг.
  6. Ёғ миқдори кам бўлган сут ичинг, шунингдек, таркибида ёғ ва туз миқдори кам бўлган қатиқ, сузма, творог ва пишлоқ каби сут маҳсулотлари таомномангизда кўпроқ бўлсин.
  7. Таркибида қанд миқдори кам бўлган озиқ-овқат маҳсулотларини танланг ва ширинлик ҳамда ширин ичимликлар истеъмолини чегаралаш орқали нохуш касалликлардан сақланиб юринг.
  8. Тузни камроқ истеъмол қилинг. Тузнинг бир кунлик миқдори 5 грамм(бир чой қошиқ)дан ошмаслиги лозим. Фақат йодланган ош тузи ишлатинг.
  9. Овқатланаётганда чой ўрнига табиий шарбатлар ёки қайнатилган сув ичинг. Чойни овқатланишлар оралиғидаги танаффусларда истеъмол қилинг.
  10. Овқат тайёрлаш жараёнида унинг хавфсизлигини таъминлаш лозим. Таомни димлаб ёки қайнатиб пишириш унинг хавфсизлигини таъминлаш билан бирга, таомдаги ёғ, туз ва шакар миқдорини камайтириш имконини беради.
  11. Янги туғилган фарзандингизни дастлабки 6 ой давомида фақат кўкрак сути билан боқинг. Уни 2 ёшгача эмизиш чораларини кўринг ва кўкракдан ажратмай, аста-секин қўшимча овқатга ўргатиб боринг.
  12. Танангиз вазнини назорат қилиб туринг, жисмоний фаол бўлинг. Кунига камида 30 дақиқа ўзингизга маъқул, имкониятингизга мос жисмоний машқларни  бажариб юринг.

Аҳмаджон ЮСУПОВ,

туман тиббиёт бирлашмаси «Саломатлик» маркази мудири.