Шеърият
Қўлимда май тўла косасан,
Ўтдан олиб, сувга соласан,
Наҳотки, сир бўлиб қоласан?
Шеърият – кўнглимга чўккан дард.
Ёмон бўлди наҳот суйганим,
Кўнглимни минг пора тилганим,
Етмасми шунчалар куйганим?
Шеърият – кўнглимга чўккан дард.
Тунлар йиғлоқ боламдайинсан,
Айтиб бўлмас ноламдайинсан,
Сен ўзга бир оламдайинсан,
Шеърият – кўнглимга чўккан дард.
Қара, бугун сочларимда оқ,
Ҳижрон ҳамон соляпти қармоқ,
Қани ўша маъсума ўртоқ?!
Шеърият – кўнглимга чўккан дард.
Олиб кетгин армонларингни,
Жонимга қасд ҳижронларингни,
Ташлаб юбор осмонларингни,
Шеърият – кўнглимга чўккан дард.
Гулзода ТУРСУНОВА.

