Ҳушёрхонадаги диалог

(Фарҳод ва Хисрав диалогига ўхшатма)

Деди: қайдин сен, эй, бадмасту гумроҳ?

Деди: мастман, мен бундан қайда огоҳ.

Деди: борму сенда бирор касби кор?

Деди: шиша билан эрурман дўст-ёр.

Деди: борму ёринг ва бола-чақа?

Деди: болалар кўп, йўқ сариқ чақа.

Деди: шўрпешона экан ул ёринг,

Деди: чунки ичсам, эшитмас зорим.

Деди: дам олишга ўн беш кун етар?

Деди: тенг ярмини қисқартса, нетар?

Деди: ичувчига йўқ бизда шафқат.

Деди: гар ичмасам, бўлар қиёмат.

Деди: ҳукм қатъий, йўқ ўзга чора.

Деди: не дегум мен уйдаги ёра?

Деди: ичма, бунда келмагин энди.

Деди: келмасдим, нозир қилди банди.

Деди: бўлмасми шу пулга олсанг нон?

Деди: май бўлса бас, йўқ нонга имкон.

Деди: дўстлар, буни не қилмоқ керак?

Мен дедим: шишасин синдирмоқ керак.

Диалогни ёзиб олувчи:

Ўринбой МЎМИНОВ.